समाजहिताच्या उपक्रमांतून गणेश मंडळांचा आदर्शवत सहभाग : उप महापौर शर्मिला बाबर

सामाजिक प्रबोधन, जनजागृतीसह विधायक उपक्रम राबविणाऱ्या मंडळांचा गौरव

पिंपरी १४ ऑगस्ट २०२६ : गणेशोत्सवाच्या माध्यमातून धार्मिक परंपरेसोबतच सामाजिक प्रबोधन आणि विधायक उपक्रमांना चालना देण्याचे काम शहरातील गणेश मंडळांकडून केले जात आहे. विविध सामाजिक उपक्रमांच्या माध्यमातून नागरिकांमध्ये सकारात्मक संदेश पोहोचविणाऱ्या गणेश मंडळांच्या कार्याची दखल घेऊन त्यांना प्रोत्साहन देणे आवश्यक आहे, असे मत उपमहापौर शर्मिला बाबर यांनी व्यक्त केले.

श्रीमंत दगडूशेठ हलवाई सार्वजनिक गणपती ट्रस्टच्या वतीने पिंपरी-चिंचवड शहरातील गणेशोत्सव मंडळांसाठी आयोजित करण्यात आलेल्या स्पर्धेच्या पारितोषिक वितरण सोहळ्यात त्या बोलत होत्या. रामकृष्ण मोरे प्रेक्षागृहात झालेल्या या कार्यक्रमात विविध गणेश मंडळांना त्यांच्या उल्लेखनीय व विधायक कार्यासाठी गौरविण्यात आले.

गणेशोत्सव हा केवळ उत्सवापुरता मर्यादित न राहता सामाजिक परिवर्तनाचे माध्यम ठरावा, यासाठी मंडळांनी सामाजिक प्रश्नांवर जनजागृती करणारे उपक्रम राबविणे गरजेचे आहे. शहरातील गणेश मंडळांकडून सामाजिक, सांस्कृतिक आणि जनजागृतीपर उपक्रम राबविले जात असून, त्यातून समाजात सकारात्मक वातावरण निर्माण होत आहे. अशा उपक्रमांना प्रोत्साहन मिळाल्यास गणेशोत्सवाची सामाजिक बांधिलकी अधिक दृढ होईल, असे बाबर यांनी नमूद केले.

या वेळी आमदार हेमंत रासने, आमदार अमित गोरखे, महापौर रवि लांडगे, विरोधी पक्षनेते भाऊसाहेब भोईर, कला, क्रीडा, सांस्कृतिक व पर्यटन समितीचे सभापती कैलास कुटे, श्रीमंत दगडूशेठ हलवाई सार्वजनिक गणपती ट्रस्टचे अध्यक्ष सुनील रासने, चिंचवड देवस्थानचे विश्वस्त मंदार देव महाराज यांच्यासह गणेश मंडळांचे पदाधिकारी व कार्यकर्ते उपस्थित होते.

पारितोषिकप्राप्त गणेश मंडळांचे बाबर यांनी अभिनंदन केले. गणेशोत्सवाच्या माध्यमातून सामाजिक एकोपा, संस्कृती आणि समाजहिताची भावना अधिक बळकट व्हावी, अशी अपेक्षाही त्यांनी व्यक्त केली.