आमदार शंकर जगताप यांचा मदतीचा हात

दुष्काळग्रस्त शेतकरी कुटुंबांची दिवाळी गोड करणार; महिनाभराचे रेशनिंग, फराळासह जनावरांसाठी चाऱ्याचीही व्यवस्था!

बीड आणि धाराशिवमधील सुमारे एक हजार शेतकरी कुटुंबांना दिलासा, पिंपरी-चिंचवडमध्ये चारा उत्पादनाचा अभिनव उपक्रम

पिंपरी-चिंचवड : मराठवाड्यातील दुष्काळाच्या झळांनी होरपळणाऱ्या शेतकरी कुटुंबांच्या आयुष्यात दिवाळीचा आनंद फुलविण्यासाठी आमदार शंकर जगताप यांनी मदतीचा हात पुढे केला आहे. आर्थिक संकटाचा सामना करणाऱ्या बीड आणि धाराशिव जिल्ह्यांतील सुमारे एक हजार दुष्काळग्रस्त शेतकरी कुटुंबांना महिनाभराचे रेशनिंग आणि दिवाळी फराळाचे वाटप करण्यात येणार आहे. एवढेच नव्हे, तर चाऱ्याअभावी संकटात सापडलेल्या शेतकऱ्यांच्या जनावरांसाठीही चाऱ्याची व्यवस्था करण्याचा महत्त्वपूर्ण उपक्रम हाती घेण्यात आला आहे. संकटग्रस्त शेतकरी कुटुंबांच्या चेहऱ्यावर समाधानाचे हास्य फुलविण्याच्या या प्रयत्नामुळे त्यांना मोठा आधार मिळण्याची अपेक्षा आहे.

शेतकरी हा देशाच्या अर्थव्यवस्थेचा कणा आणि संपूर्ण समाजाचा अन्नदाता आहे. मात्र, दुष्काळामुळे शेती, पाणी आणि जनावरांच्या चाऱ्याचा प्रश्न गंभीर बनला आहे. अशा कठीण परिस्थितीत शेतकरी कुटुंबांची दिवाळी अंधारात जाऊ नये, त्यांच्याही घरात सणाचा आनंद नांदावा, या सामाजिक भावनेतून हा मदत उपक्रम राबविण्यात येत आहे.

राष्ट्रीय स्वयंसेवक संघाच्या प्रेरणेतून ‘राष्ट्र प्रथम, समाज प्रथम’ या विचाराने हा उपक्रम हाती घेण्यात आला आहे. कार्यकर्त्यांच्या माध्यमातून मदत थेट लाभार्थी शेतकरी कुटुंबांपर्यंत पोहोचविण्यात येणार असल्याची माहिती आमदार शंकर जगताप यांनी दिली.

जनावरांच्या चाऱ्यासाठी पिंपरी-चिंचवडमध्ये पुढाकार

दुष्काळग्रस्त भागात केवळ माणसांच्या अन्नधान्याचा प्रश्न गंभीर नाही, तर जनावरांच्या चाऱ्याची टंचाईही शेतकऱ्यांसमोर मोठे संकट बनून उभी आहे. जनावरे ही शेतकऱ्यांच्या उपजीविकेचा महत्त्वाचा आधार असल्याने त्यांच्यासाठी चारा उपलब्ध करून देण्याच्या दृष्टीने आमदार जगताप यांनी पुढाकार घेतला आहे.

पिंपरी-चिंचवड शहरातील पडीक आणि नापीक जमिनीवर चारा उत्पादन करण्याची योजना आखण्यात आली आहे. यासंदर्भात स्थायी समितीचे अध्यक्ष आणि महापालिका आयुक्त यांच्याशी चर्चा करण्यात आली असून, शहरातील काही जागाही निश्चित करण्यात आल्या आहेत.

महापालिका आयुक्तांनी शासनाकडून आवश्यक परवानगी मिळविल्याची माहिती देण्यात आली आहे. त्यामुळे येत्या एक ते दोन महिन्यांत निश्चित केलेल्या जागांवर चारा उत्पादन सुरू होण्याची अपेक्षा आहे. या जमिनीवर उत्पादित होणारा चारा दुष्काळग्रस्त भागातील शेतकऱ्यांच्या जनावरांसाठी पाठविण्याचा प्रयत्न केला जाणार आहे.

सामाजिक बांधिलकीतून शेतकऱ्यांना आधार

दुष्काळाच्या संकटात शेतकरी कुटुंबांना केवळ आश्वासनांची नव्हे, तर प्रत्यक्ष मदतीची गरज आहे. अन्नधान्य आणि दिवाळी फराळाच्या वाटपातून कुटुंबांना दिलासा देण्यासोबतच जनावरांसाठी चाऱ्याची व्यवस्था करण्याचा प्रयत्नही या उपक्रमातून केला जात आहे.

दुष्काळग्रस्त शेतकऱ्यांच्या अडचणी लक्षात घेऊन राबविण्यात येणाऱ्या या उपक्रमामुळे सामाजिक बांधिलकी आणि परस्पर सहकार्याचा संदेश दिला जात आहे. संकटाच्या काळात शेतकरी कुटुंबांच्या पाठीशी उभे राहून त्यांना दिलासा देण्याचा प्रयत्न असल्याचे आमदार शंकर जगताप यांनी स्पष्ट केले.