आचारसंहितेचा फटका! जलवाहिनी, कर्करोग रुग्णालयाचे भूमिपूजन लांबणीवर; हिंजवडीसह सात गावांच्या निर्णयालाही विलंब

पिंपरी : पुणे पदवीधर आणि शिक्षक मतदारसंघाच्या निवडणुकीची आचारसंहिता लागू झाल्याने पिंपरी-चिंचवड महापालिकेतील विविध विकासकामांना महिनाभराचा विलंब होण्याची शक्यता आहे. आंद्रा धरणातून थेट जलवाहिनीद्वारे शहरात पाणी आणण्याचा प्रकल्प, थेरगावातील कर्करोग रुग्णालय, इंद्रायणी नदी सुधार प्रकल्प, पवना बंदिस्त जलवाहिनीबाबतची बैठक यांसह विविध महत्त्वाच्या कामांवर आचारसंहितेचा परिणाम झाला आहे.

आचारसंहितेमुळे महापालिकेला धोरणात्मक निर्णय घेण्यावर मर्यादा आल्या आहेत. त्यामुळे सर्वसाधारण सभा, साप्ताहिक स्थायी समितीच्या बैठका तसेच विविध विषय समित्यांच्या सभा घेता येणार नाहीत. परिणामी, महापालिकेच्या अनेक प्रस्तावांवरील निर्णय आणि विकासकामांच्या पुढील प्रक्रियेला विलंब होणार आहे.

आंद्रा जलवाहिनीचे कामही लांबणीवर

आंद्रा धरणातून पिंपरी-चिंचवड शहरासाठी १०० एमएलडी पाणी आरक्षित करण्यात आले आहे. आंद्रा धरण परिसरात जॅकवेल उभारून धरणापासून चिखली येथील जलशुद्धीकरण केंद्रापर्यंत बंदिस्त जलवाहिनीद्वारे पाणी आणण्याचे नियोजन आहे. या कामाच्या निविदा प्रक्रियेचे काम अंतिम टप्प्यात असतानाच आचारसंहिता लागू झाल्याने पुढील कार्यवाहीला विलंब होण्याची शक्यता आहे.

कर्करोग रुग्णालयाच्या भूमिपूजनाला ब्रेक

थेरगाव येथे महापालिकेच्या माध्यमातून कर्करोग रुग्णालय उभारण्यात येणार आहे. या प्रकल्पाच्या कामाचा शुभारंभ करण्याचे प्रशासनाचे नियोजन होते. मात्र, आचारसंहिता लागू झाल्यामुळे भूमिपूजनाचा कार्यक्रम पुढे ढकलावा लागणार आहे.

इंद्रायणी नदी सुधार प्रकल्पालाही विलंब

इंद्रायणी नदी सुधार प्रकल्पाच्या कामासाठी संबंधित ठेकेदाराला कार्यारंभ आदेश देण्यात आला आहे. त्यामुळे या प्रकल्पाचे भूमिपूजन करण्याचे नियोजन होते. मात्र, आचारसंहितेमुळे हा कार्यक्रमही लांबणीवर पडला आहे.

पवना बंदिस्त जलवाहिनीबाबतची बैठक पुढे ढकलली

गेल्या अनेक वर्षांपासून प्रलंबित असलेल्या पवना बंदिस्त जलवाहिनी प्रकल्पाबाबत मुख्यमंत्री यांच्यासोबत यापूर्वी बैठक झाली होती. त्यानंतर जिल्हाधिकाऱ्यांनी प्रकल्पामुळे बाधित होणाऱ्या शेतकऱ्यांच्या मागण्या जाणून घेतल्या होत्या. या विषयावर मुख्यमंत्र्यांसोबत दुसरी बैठक घेण्याचे प्रशासनाचे नियोजन होते. मात्र, आचारसंहितेमुळे ही बैठक आता पुढे ढकलली जाणार आहे.

हिंजवडीसह सात गावांच्या निर्णयाची प्रतीक्षा

हिंजवडी आयटी पार्कसह सात गावे पिंपरी-चिंचवड महापालिकेत समाविष्ट करण्याच्या हालचाली सुरू आहेत. मुख्यमंत्री देवेंद्र फडणवीस यांनी याबाबत संकेत दिले होते. मात्र, आचारसंहिता लागू झाल्यामुळे या निर्णयालाही विलंब होण्याची शक्यता आहे.

पदाधिकाऱ्यांची शासकीय वाहने जमा

आचारसंहितेच्या पार्श्वभूमीवर महापौर रवी लांडगे यांच्यासह उपमहापौर, महिला व बालकल्याण समिती, विधी समिती, शिक्षण समितीच्या सभापतींसह इतर पदाधिकाऱ्यांची शासकीय वाहने जमा करण्यात आली आहेत. तसेच महापालिकेची वाहने न वापरणाऱ्या पदाधिकाऱ्यांच्या खासगी वाहनांवरील पदनामाचे फलक, दालनातील राजकीय फलक आणि पक्षाची चिन्हे झाकण्यात आली आहेत.

आचारसंहितेमुळे महापालिकेच्या नियमित प्रशासकीय कामकाजावर मर्यादा आल्याने अनेक महत्त्वाच्या प्रकल्पांना आता पुढील महिन्यापर्यंत प्रतीक्षा करावी लागणार आहे.