विकासकामांसाठी छाटलेल्या झाडांचे लाकूड स्मशानभूमीत अंत्यविधीसाठी मोफत उपलब्ध होणार:- स्थायी समिती सभापती अभिषेक बारणे यांची माहिती

त्वरित कार्यवाहीबाबत संबंधित विभागाला सूचना; लाकडाचे होणार योग्य व्यवस्थापन

पिंपरी-चिंचवड:
शहरातील विकासकामे, रस्ते रुंदीकरण आणि विविध कारणांमुळे मोठ्या प्रमाणावर झाडांची छाटणी केली जाते. या छाटल्या जाणाऱ्या झाडांचे लाकूड आता वाया न घालवता महापालिकेच्या वतीने शहरातील विविध स्मशानभूमींमध्ये अंत्यविधीसाठी मोफत उपलब्ध करून देण्यात येणार आहे. स्थायी समिती सभापती अभिषेक बारणे यांनी या महत्त्वपूर्ण धोरणात्मक निर्णयाची माहिती दिली. याबाबत संबंधित विभागाला त्वरित कार्यवाही करण्याच्या सूचना करण्यात आल्याचेही त्यांनी सांगितले.

शहरात विविध विकासकामांदरम्यान झाडांची छाटणी केली जाते. या छाटणीदरम्यान निघणारे लाकूड अनेकदा इकडे-तिकडे टाकून दिले जाते किंवा अयोग्य व्यवस्थापनामुळे ते वाया जाते. या समस्येचे गांभीर्य लक्षात घेत स्थायी समितीने या लाकडांचा योग्य वापर करण्याचा निर्णय घेतला आहे. या नवीन धोरणांतर्गत, छाटणीतून मिळणारी ही सर्व लाकडे थेट शहरातील विविध स्मशानभूमींमध्ये पाठवली जातील.

या उपक्रमामुळे शहरातील नागरिकांना अंत्यसंस्कारासाठी लाकूड सहज उपलब्ध होणार आहे. शोकसागरात बुडालेल्या किंवा आपत्कालीन परिस्थितीत असणाऱ्या नागरिकांना बाजारातून वेगळी लाकडे विकत आणण्याची कोणतीही गरज भासणार नाही. एरवी कचऱ्यात किंवा अयोग्य ठिकाणी पडून नष्ट होणाऱ्या या लाकडांचा अत्यंत पवित्र आणि सामाजिक कामासाठी सदुपयोग केला जाणार असून, लवकरच महापालिकेच्या वतीने या उपक्रमाची प्रत्यक्ष अंमलबजावणी सुरू होईल.

“शहरात विविध कारणांमुळे जी झाडे छाटली जातात, त्यातून निकोप आणि उत्तम दर्जाचे लाकूड उपलब्ध होते. हे लाकूड फेकून देऊन वाया घालवण्याऐवजी आम्ही धोरणात्मक निर्णय घेतला आहे. ही सर्व लाकडे स्मशानभूमीत अंत्यविधीसाठी मोफत उपलब्ध करून दिली जावीत. यासाठी नागरिकांना वेगळी लाकडे आणण्यासाठी कोणतीही कसरत करावी लागणार नाही.”

— अभिषेक बारणे (सभापती, स्थायी समिती, पिंपरी-चिंचवड महानगरपालिका)