मोशीत साकारणार वंचित आदिवासी समाजासाठी सर्वांगीण विकास केंद्र!

भाजपा आमदार महेश लांडगे यांच्या पाठपुराव्याला यश
राज्य मंत्रिमंडळाची जमीन देण्याच्या प्रस्तावाला मंजुरी

पिंपरी-चिंचवडमधील मौजे मोशी (ता. हवेली) येथील १५ हेक्टर शासकीय जमीन क्रांतिवीर चापेकर समिती, क्रांतितीर्थ चापेकर बंधू राष्ट्रीय संग्रहालय (चिंचवड गाव) आणि पुनरुत्थान समरसता गुरुकुलम अनुदानित आदिवासी आश्रम शाळेला देण्यास राज्य मंत्रिमंडळाने मंजुरी दिली आहे. भाजपा आमदार महेश लांडगे यांनी सातत्याने केलेल्या पाठपुराव्याला अखेर यश आले असून, या जागेवर मागास व वंचित आदिवासी समाजासाठी शिक्षण, संस्कार आणि सामाजिक विकासाचे सर्वांगीण केंद्र साकारण्याचा मार्ग मोकळा झाला आहे.

क्रांतिवीर चापेकर समितीचे पद्मश्री गिरीश काका प्रभुणे यांनी या जागेची मागणी केली होती. त्यांच्या मागणीला राज्य सरकारने सकारात्मक प्रतिसाद दिला. विधानसभा अधिवेशनादरम्यान आमदार महेश लांडगे यांनी महसूल मंत्री चंद्रशेखर बावनकुळे यांची प्रत्यक्ष भेट घेऊन या जागेचा प्रश्न मार्गी लावण्याची विनंती केली होती. या मागणीला मुख्यमंत्री देवेंद्र फडणवीस यांनीही सकारात्मक बळ दिले. त्यानंतर शासनस्तरावर प्रक्रिया गतिमान झाली आणि अखेर मंत्रिमंडळाच्या बैठकीत १५ हेक्टर शासकीय जमीन देण्याच्या प्रस्तावाला मंजुरी मिळाली.

आमदार महेश लांडगे यांनी ‘क्रांतिवीर चापेकर समिती जागा मागणी’ हा विषय सातत्याने शासनदरबारी लावून धरला होता. नुकतेच त्यांनी महसूलमंत्री चंद्रशेखर बावनकुळे यांना पत्र पाठवून पिंपरी-चिंचवड शहरातील प्रलंबित विषयांबाबत आढावा बैठक घेण्याची विनंती केली होती. यामध्ये या जागेच्या मागणीचाही समावेश होता. त्यांच्या सातत्यपूर्ण पाठपुराव्यामुळे आता या महत्त्वाकांक्षी प्रकल्पाला गती मिळणार आहे.

मंजूर करण्यात आलेल्या या जागेवर क्रांतिवीर चापेकर समिती, क्रांतितीर्थ चापेकर बंधू राष्ट्रीय संग्रहालय आणि पुनरुत्थान समरसता गुरुकुलम अनुदानित आदिवासी आश्रम शाळेच्या माध्यमातून मागास व वंचित आदिवासी समाजाच्या सर्वांगीण उन्नतीसाठी विकास केंद्र साकारले जाणार आहे. या केंद्राच्या माध्यमातून आदिवासी समाजातील विद्यार्थ्यांना शिक्षण, संस्कार, कौशल्यविकास आणि सामाजिक प्रगतीच्या संधी उपलब्ध होण्यास मदत होणार आहे.

या निर्णयाबद्दल आमदार महेश लांडगे यांनी राज्य शासन, मुख्यमंत्री देवेंद्र फडणवीस आणि महसूल मंत्री चंद्रशेखर बावनकुळे यांचे आभार मानले आहेत. सामाजिक समरसता, शिक्षण आणि वंचित घटकांच्या विकासाला चालना देणारे हे केंद्र पिंपरी-चिंचवड परिसरासाठी महत्त्वपूर्ण ठरणार आहे.

“पद्मश्री गिरीश काका प्रभुणे यांनी केलेली मागणी आणि त्यामागील व्यापक सामाजिक उद्देश लक्षात घेऊन हा विषय शासनदरबारी सातत्याने मांडला. विधानसभा अधिवेशनादरम्यान महसूल मंत्री चंद्रशेखर बावनकुळे यांची प्रत्यक्ष भेट घेऊन जागेचा प्रश्न मार्गी लावण्याची विनंती केली. मुख्यमंत्री देवेंद्र फडणवीस यांनीही या मागणीला सकारात्मक बळ दिले. अखेर मंत्रिमंडळाने १५ हेक्टर शासकीय जमीन देण्यास मंजुरी दिल्याने हा प्रश्न मार्गी लागला, याचा मनस्वी आनंद आहे. या केंद्रामुळे वंचित आदिवासी समाजातील मुलांना शिक्षण, संस्कार आणि विकासाच्या नव्या संधी मिळतील. पिंपरी-चिंचवड शहर व परिसराच्या सर्वांगीण विकासासाठी माझा पाठपुरावा यापुढेही असाच सुरू राहील.”
– महेश लांडगे, आमदार, भाजपा, पिंपरी-चिंचवड, पुणे.